• Grünert Matthias

Tge tratgs linguistics èn tipics per il rumantsch?

En congual cun autras linguas romanas ed il tudestg sa caracterisescha il rumantsch cun differents tratgs particulars. Nus ans basain sin studis en le litteratura e faschain atgnas observaziuns en texts ed en producziuns a bucca. Temas da las suandantas domenas pon vegnir perscrutads:

- la fonologia da las varietads rumantschas,

- la morfologia/sintaxa dal verb, dal pronom persunal, da l’adjectiv etc.,

- la segunda posiziun dal verb (“inversiun dal subject”),

- la congruenza tranter il subject ed il verb,

- la marcaziun differenziala da l’object (“accusativ preposiziunal”) en ladin,

- la negaziun,

- la furmaziun dals pleds.

Nus ans famigliarisain cun la litteratura linguistica, ans occupain criticamain da las interpretaziuns dals fenomens examinads e congualain questas cun las preschentaziuns en las grammaticas per la scola. Las descripziuns teoreticas e las normas fixadas vegnan congualadas cun la pratica en differentas producziuns, scrittas ed a bucca.

Las participantas ed ils participants...

– èn sa famigliarisads cun la litteratura e la terminologia speziala en connex cun ils fenomens tractads,

– enconuschan la discussiun sur dals fenomens tractads en la litteratura speziala e san opponer questa a la preschentaziun en las grammaticas per la scola,

– san identifitgar e commentar ils fenomens tractads en texts.

Liver, Ricarda 2010: Rätoromanisch. Eine Einführung in das Bündnerromanische, 2. Auflage, Tübingen: Narr

Anderson, Stephen R. 2016: «Romansh (Rumantsch)», en: Adam Ledgeway/Martin Maiden (ed.), The Oxford Guide to the Romance Languages, Oxford: Oxford University Press, 169-184

Linder, Karl Peter 1987: Grammatische Untersuchungen zur Charakteristik des Rätoromanischen in Graubünden, Tübingen: Narr (Tübinger Beiträge zur Linguistik 275)
 

Evaluaziun sin basa d'in referat e sin basa da la participaziun a las discussiuns en il seminari.