Linguatg e litteratura rumantscha
Il sistem da Bologna, valaivel per tut ils students da l'Universitad da Friburg, prevesa duas etappas da studi. L'emprima etappa vegn terminada suenter trais onns cun il bachelor, la segunda suenter dus ulteriurs onns cun il master, che correspunda al licenziat da pli baud. Er il studi da scolast secundar en rom principal è integrà en quest sistem. El è equivalent al studi da bachelor en rumantsch sco segunda domena e dat la pussaivladad da cuntinuar cun il studi da master en segunda domena senza ulteriuras pretensiuns.
Il studi da bachelor dat la basa necessaria per ina spezialisaziun tar la cuntinuaziun dal studi fin al master, permetta dentant er da terminar ils studis universitars cun fitg bunas enconuschientschas dal rumantsch e davart il rumantsch.
La domena 'Linguatg e litteratura rumantscha' po vegnir cumbinada cun tut las autras domenas offridas da la Facultad da scienzas umanas ed er intginas domenas ordaifer questa facultad. Per il diplom da scolast secundar e gimnasial ston las ulteriuras domenas dentant vegnir tschernidas entaifer ils roms d'instrucziun da las scolas correspundentas.
| 
