|
Ils curs èn repartids en moduls. In onn da studi cumpiglia en rom principal in modul da linguatg, in modul da litteratura ed ina lavur da seminari. En rom secundar u tar il studi da scolast secundar èn linguatg e litteratura mintgamai integrads en in sulet modul. Il dumber da puncts ECTS ch'è da cuntanscher en in onn da studi è inditgà en ils differents plans da studi. Ins po cumenzar cun il studi mintga semester d'atun, independentamain dal modul offrì durant l'emprim onn da studi.
Las cumpetenzas cumplementaras ("soft skills") pon vegnir tschernidas sin basa d'ina glista da las occurrenzas che vegnan offridas. Per la recuperaziun dal latin, ch'è obligatori per il studi dal rumantsch en domena principala, vegnan 6 ECTS renconuschids.
Istorgia dal linguatg
Las lecziuns dattan ina survista da l'istorgia dal rumantsch davent da l'entschatta da la colonisaziun dal territori grischun fin en il 19avel tschientaner. Il seminari da quest modul s'occupa da texts da questas periodas. Il modul da basa general da la filologia romana metta il rumantsch en il context pli vast dad auters linguatgs e litteraturas romanas. En accord cun il responsabel per la domena 'Rumantsch' po quest modul da filologia romana vegnir remplazzà da lecziuns e seminaris correspundents da filologia taliana u spagnola.
Linguistica teoretica
Las lecziuns dattan ina survista da las metodas da la linguistica dal 20avel tschientaner. En ils seminaris vegnan tractads problems specifics da la linguistica. Tar quest modul tutga er in seminari da translaziun.
Linguistica applitgada
Las lecziuns s'occupan dal rumantsch modern ed actual. Ils seminaris tractan problems da la descripziun grammaticala dal rumantsch actual. Tar quest modul tutga er ina introducziun en il rumantsch grischun.
Litteratura dal temp modern
En quest modul vegnan tractads texts dal 19avel e da l'emprima mesadad dal 20avel tschientaner, da l'entschatta da la belletristica rumantscha fin al temp suenter la segunda guerra mundiala.
Litteratura contemporana
En quest modul vegnan tractads texts litterars davent dals 1950.
Pervi da la quantitad e qualitad differenta dals texts da questas duas periodas pon er texts contemporans vegnir tractads en il modul da la litteratura dal temp modern.
Linguatgs e litteraturas romanas
Ils students/las studentas pon tscherner tranter dus moduls da basa u in modul d'orientaziun en in dals roms filologia romana, talian u spagnol dal Departament da linguatgs e litteraturas romanas.
Las lavurs da seminari èn lavurs independentas che na ston betg star directamain en connex cun ils temas tractads en ils seminaris. La dimensiun da questas lavurs è dependenta dal dumber da puncts ECTS ch'ellas survegnan (2 ECTS = 5-10 paginas; 3 ECTS = 10-15 paginas; 4 ECTS = 15-20 paginas).
La lavur da diplom po vegnir fatga en linguatg u en litteratura. Ella remplazza dus seminaris en la domena tschernida per la lavur (10 ECTS = 30-40 paginas).
Las lecziuns evaluadas vegnan examinadas cun in test en scrit da ca. 30 minutas a la fin dal semester. Ils seminaris vegnan validads cuntinuadamain tras pensums a bucca ed a scrit u er tras in test en scrit. Tut las unitads da furmaziun survegnan ina nota. La media da las notas da las unitads d'in modul dat la nota dal modul, che quinta per la nota dal diplom.
L'examen a la fin da l'emprim onn da studi vegn considerà sco reussì, cura ch'il(s) modul(s) da l'emprim onn è(n) reussì(ds).
|
