|
L'universitad da Friburg è in'universitad da grondezza mesauna cun var 10'000 students. Ella è la suletta universitad svizra bilingua (franzos-tudestg). Ella ha tschintg facultads: teologia, dretg, scienzas economicas e socialas, scienzas umanas e scienzas natiralas (inclusiv medischina).
Las tschintg facultads èn structuradas en departaments ed instituts. La Facultad da scienzas umanas, la pli gronda facultad da l'universitad, ha 14 departaments. Ils departaments cumpiglian ina u pliras domenas, tut tenor materia, dumber da professers e da students. In da quests 14 departaments è er il Departament da linguatgs e litteraturas romanas.
Il Departament da linguatgs e litteraturas romanas cumpiglia ils linguatgs romans talian, spagnol, rumantsch ed ils linguatgs e litteraturas romanas medievalas. Il franzos ha in agen departament pervi dal dumber da professers e students, malgrà ch'el tutga er tar ils linguatgs romans. Il Departament da linguatgs e litteraturas romanas cumpiglia 7 professers e ca. 400 students.
La domena ed il rom Linguatg e litteratura rumantscha fa part dal Departament da linguatgs e litteraturas romanas. L'universitad da Friburg è la suletta universitad dal mund che offra quest rom sin l'entir sectur dal studi universitar sco domena principala e secundara: diplom da magister secundar, bachelor, master, scolast gimnasial e doctorat.
En il decurs dal studi da linguatg e litteratura rumantscha survegnan ils students ina survista sur da tut ils secturs da la domena.
linguatg:
Sin quest sectur cumpiglia il program da studi d'ina vart l'istorgia dal linguatg da l'entschatta da la colonisaziun dal Grischun fin al svilup dal rumantsch en il 20avel tschientaner, da l'autra vart las enconuschientschas fundamentalas da la linguistica e lur applicaziun per la descripziun dal linguatg actual.
litteratura:
En il studi da la litteratura rumantscha vegn tractà la belletristica dal 19avel tschientaner fin en il temp actual sin basa dad ovras e texts ch'èn d'impurtanza speziala per ils differents geners litterars durant las differentas periodas da la litteratura rumantscha. Ils emprims texts rumantschs percunter vegnan tractads en il rom da l'istorgia dal linguatg. I vegn er tematisà las cundiziuns ed ils problems spezials da litteraturas minoritaras.
Per pli blers detagls cf. plans da studi → organisaziun dal studi |
